الناس اللي عندها 16 سنة أو أصغر ومبهورة بإعلان بيبسي

 
الناس اللي عندها 16 سنة أو أصغر ومبهورة بإعلان بيبسي ....

احب أقولوكوا ليه جيلنا عينه دمعت...اصل انتوا متعرفوش رمضان...
رمضان كان تعليق الفوانيس والزينة في الشارع ليلتها...
كان صوت أبوك وهو نازل على رجله يدي المسحراتي اللي فيه القسمة عشان يقول اسمك واسم إخواتك كل ليلة.
كان تفصيص البلح مع ماما وصوت القرأن الكريم للشيخ عبد الباسط...
كان صوت الشعراوي قبل الفطار..
كان لمة العيلة حوالين طبق كنافة وطبق قطايف ...
يعني ننزل نلعب في الشارع بالفانوس ابو شمعة وإيدنا تتلسع في تغيير الشمعة ونبقى مبسوطين...
نيللي, شريهان والف ليلة وليلة على ايامنا كانوا يجننوا بس اهالينا كانوا شايفنهم مسخوا رمضان..
واهالينا دلوقتي اللي عندهم إحباط من مسلسلات بتشجع العنف والضرب والقذارة الفكرية واللفظية...

عمو فؤاد اللي كان بيعلمنا حاجات محترمة وقيم في كل حلقة
اصل مكانش عندنا خيم رمضانية ..

كانت المودة والحب الحقيقي وصلة الرحم بتحصل بجد...
كانت النفوس جميلة وراضية..
كان وقفتنا ورا جدودنا في الصلاة رعب وفرحة وعظمة..
كان حضن أبوك لما تصوم يوم كامل من غير غش فرحة وأمان وشعور بالنضج ولا كأنك خريج جامعة ..
فرحة اخر عشر ايام عشان بننزل ندور على لبس العيد وشيلة الولاد للصاجات للفرن...
ريحة روح الكعك في البيت تخليك تحس بأدمية مش طبيعية وتبقى مش قادر تستنى صوت تكبير صلاة العيد..

ايااااااااااااام