اهمال الرعاية الصحية بأكاديمية الشروق تؤدي بحياة طالب

محمد ممدوح عبد العزيز الطوخي
طالب في اولى عمارة بأكاديمية الشروق
توفى صباح اليوم

ما حدث على لسان زمايله
كان عنده سيولة فى الدم ونقص فى الصفائح الدموية وكان غايب عن الجامعة
لمدة اسبوعين ورجع يوم الاثنين اللى فات علشان تسليم مشروع مادة التصميم
المعماري وكان كويس لكن فجأة ارتفع ضغط الدم ونقلوه زمايله للرعاية الصحية
بالاكاديمية في مبنى عمارة لما دخل جسمه كان مشدود جدا و مش عارفين حتي
يقعدوه علي الكرسي اصحابه كانوا شايلينه
لما الدكتورة معرفتش تعمل حاجة بعتت لدكتور تاني من مبنى الرعاية الصحية بمبنى مدني
الدكتور فضل يخبطه في جسمه و وقوله يا محمد ما تمثلش انا عارف ان مافيش
فيك حاجة و حاول يقومة بالعافية اصحابة اللي حضروا الموضوع قالهوا انه كان
تعبان جداً مش قادر يرد
جهل دكاترة مش عارفين يتعاملوا مع الحالة

فنقلوه مستشفي الشروق "بميكروباص الاكاديمية" ومابعتوش من الكلية غير سواق
المكروباص و اصحاب محمد بس و طبعا المستشفي ما رضيتش تدخله في الاول

وهو فى الطريق ضغطه عِلي جدا وحصله تشنجات وجاله ضيق تنفس ادي الى اصابته
بنزيف فى المخ ونزيف في المعدة واتنقل بعد كده من مستشفى الشروق الى المركز
الطبي العالمي والآن هو بين ايدين ربنا
مريض الضغط ليه ادوية خاصة بس
برضه اهمال الاكاديمية في نقل الطالب للمستشفى بميكروباص غير مجهز بدل من
عربية اسعاف ومن غير ما يبعتوا حد من الادارة معاه ده تسيب واهمال

الاسعافات الاولية اللي المفروض تتعمل للمريض المصاب بارتفاع ضغط الدم
واشتباه الاصابة بنزيف في المخ استخدام اجهزة دعم الحياة اذا كان المريض
فاقد للوعي اللي بتبقي متوفرة في اي عربية اسعاف

صاحب اكاديمية الشروق رجل الاعمال محمد فريد خميس
مصاريف الطالب الواحد في السنة بتقفّل 15 الف جنيه
ومع ذلك مش عارفين يهتموا بالرعاية الصحية وصحة الطلبة .. ماعندهومش ضمير
وجشعهم وماديتهم بتعميهم وحياة الطلبة عندهم رخيصة المهم الفلوس
اللي حصل مع محمد مش اول مرة يحصل .. حصل مع طلبة كتير جداً
مش هانسكت غير لما يجي حق محمد بمحاسبة الدكاترة المهملين وتغيير مجلس الادارة
ونضمن لكل طالب حقه في رعاية صحية محترمة عيادات مجهزة

وجدير بالذكر انه سيتم عمل وقفه احتجاجيه لطلاب اكاديميه الشروق الثلاثاء الموافق 7/5/2013