مين فينا مبيحبش ريحة القهوة عالصبح ومبيشربش كل يوم قهوة عشان تعدل مزاجه
النهارده حنتكلم عن القهوه علميا بقى يعنى مكوناتها اضرارها فوايدها وهكذا
القهوه فيها مواد كتيره اهمها الالكالويد اللى فى منه نوعين (لأول يعرف بالكافيين وتبلغ نسبته 1,5 ـ 0,3% ،و الثاني تراي جونللين ونسبته 0,2 ـ 0,7 %)
وشوية بروتين و tannin اللى اتكلمنا عنه قبل كده انه بيوقف النزيف
النهارده كلامنا عن الكافيين واللى الناس بتشرب القهوه عشانه اصلا
انت بتشربها عشان تفوق طب هى بتعمل كده ليه؟؟ عشان الكافيين ده بيجى عالمخ بتاعك اللى فيه مستقبلات لمادة مشهوره اسمها ادينوسين ودى المسئوله انها تنيمك يروح الكافيين يمسك مكانها ويضحك عليها تيجى تمسك متعرفش فتفضل سيادتك فايق ومصحصح عشان تذاكر طبعا مش عشان اى حاجه تانيه
طب حلو اوى وكمان بيزود معدل الحرق فى الجسم (بيساعد فى الريجيم بس منغير سكر طبعا)
و فى دراسات انه بيقلل احتمال الاصابه بمرض السكر ومرض باركنسون وكمان الزهايمر
كمان القهوة تقلل من تعب عضلاتك وإجهادها اثناء التمارين الراضيه.
ياااااااااه ما القهوه حلوه اوى ليه بيقولو انها مضره
لانها زى ما ليها فوايد بتعمل مشاكل كتير اهمها الاتى:
• تصيبك القهوة بالسهر والأرق, وعدم الفدرة على النوم بسهولة.
• خطرة للأشخاص اللي يعانون من عدم إنتظام ضربات القلب بصورة كبيرة.
• تغير لون الأسنان ومدرة لبول لذلك ينصح بشرب كوب ماء لكل كوب قهوة.
• ممكن تزيد من حدة حرقان المعدة.
• يمكن ان تزيد من أعراض القولون العصبي والإسهال.
• يمكن للحامل شرب كوبين أو أقل يومياً ولكن الإكثار عن ذلك يؤدي لزيادة نسبة الإجهاض أو ولادة أطفال قليلي الوزن.
• القهوة تزيد من حدة القلق لمن يشكو منه.
• القهوة قد تزيد من كمية الكالسيوم بالبول فتزيد مشكلة هشاشة العظام ، لذلك يجب عدم شرب أكثر من ٢-٣ أكواب لمن لديه هشاشة.
• شرب القهوة الغير مغلية (غير مفلترة) أو التركية يزيد من الكولسترول و الدهون بسبب وجود مادة كافيستول و كاهويوال الإسبرسو يحتوي على هاتين المادتين بصورة أكبر من القهوة العادية ولكل صغر حجم الكوب يقلل من إرتفاع الدهون بسببهما.
• القهوة ممكن تزيد ضغط الدم ولكن يقل هذا التأثير عند من يتناولها بصورة دورية عشان كده بلاش مريض الضغط يشربها.
نشرب قهوه ولا بلاش
ببساطه حقولك لو عندك مرض من اللى الكافيين بيزودهم يبقى بلاش او كفايه فنجان واحد عليك كل كام يوم
او لو واحده حامل او حد سنه كبير والاطفال طبعا
لو مش من دول حقولك برضه خليك معتدل يعنى من فنجان لفنجانين فى اليوم كويس اوى عشان ناخد الفايده بتاعتها ونبعد عن الضرر وانت اللى حتقرر بنفسك اثرها عليك
ايه ده هو الاثر بيختلف من واحد للتانى؟؟
اه طبعا لان الجينات المسئوله عن مدة تواجد الكافيين بالجسم بتختلف حتلاقى واحد فنجان صغير قهوه الصبح ميعرفش ينام منه طول الليل وواحد بيشرب 3-4 وينام عادى جدا
كمان
التدخين بيُسرّع من عملية هضم مادة الكافيين، مما يقلل من المدة التي تتواجد فيها المادة بالجسم. وبالعكس بقى حبوب منع الحمل بتبطئ عملية هضم الكافيين، و بالتالي تطول مدة تواجد هذه المادة بالجسم.
كمية الكافيين فى القهوه هى كالتالى :
١٠٠ مللي جرام من الكافيين هو المعدّل الطبيعي لكل كوب بحجم ٢٤٠ ملي.
يحتوي الشاي على نصف كمية الكافيين الموجودة بالقهوة.
كوب من القهوة المنزوعة الكافيين بحجم ٢٤٠ ملي يحتوي على ٢ ملي جرام كافيين.
يعنى من الاخر احنا مش حنقولك امنع القهوه بس خليك معتدل وبلاش القهوه مع السجاير طبعا دى بتزود التاثير الضار جدا
والتاثير مش حيبان فى يوم وليله بس حتشوفه على المدى فخد بالك من صحتك من الاول
وعندك واحد قهوة مظبوط هنا لكل الفانز
استنى حتعمل ايه؟؟
حد قالك اشربه
اصل القهوه طلع ليها استخدامات تانيه مهمه اوى غير انها تشرب كمنبه
اه والله زمبقولك كده وحثبتلك بالدليل
ركز معايا يا سيدى
1-بيقولك لو ريحة التلاجه وحشه وعاوز حاجه تضيعها حط حاجه فيها قهوه جواها حتمتص الريحه.
2-كمان للخطوط البيضاء اللى اسمها سليوليت بتحط القهوة على زيت زيتون وتدهن على المنطقه بتظبطها.
3-كمان لو عملت فنجان قهوه ورحت حطيته على شعرك بعد ما تغسله وتسيبه 20 دقيقه وتغسله مره اسبوعيا حيبقى لامع وصحى وبيقلل التساقط كمان.
4-كمان صبغة طبيعية للورق والقماش وحتى احيانا الشعر.
5-بيقشر الجلد ويشيل الجلد الميت ويدى للجسم مظهر جميل.
6-بيطرد النمل يعنى لو عندك مكان خايف عليه من النمل رش فيه بودرة قهوه.
7-بيخصب التربه للنباتات وممكن يستخدم للزينه فى الفازات ولو حطيت شوية صغيره فى الاكل بيدى طعم حلو وحاجات تانيه كتير بس كفايه عليكو كده.
كده خلصنا كل كلامنا عن القهوه اتمنى يكون الكلام افادكم