نسمع ونشوف عن حشو الضروس تابعنا مع على وشوف هيختار انهى نوع ^__^
" علي" طالب في كليه طب الفم و الأسنان بس مع الأسف هو مش بيهتم بأسنانه خااالص تقدرو تقولو باب النجار مخلع في يوم رضي عن اسنانه و قرر يغسلها و هنااا كانت الفاجعه .. تااتاااتاااا
ايه الاسود ده؟! ضرسي سوس لا لا انا هتأكد الاول .. هو الي بنعملو في الناس هيطلع علينا و لا ايييه ( و راح جاب ال probe الي بيتأكد بيه ان كان ده تسوس و لا مجرد تلون ) ده تسوس فعلا اعمل ايييه يا ربي ..
أنا الي مكنتش بغسل اسناني و كنت مهمل المهم دلوقتي لازم اروح للدكتور عشان يحشيهولي في اقرب وقت لان التسوس لو وصل للعصب هتعب اوي، خلاص انا هروح لسامح صاحبي العيادة بتاعتو عشان يحشيهولي بس السؤال هنا احشي حشو اييييه؟ حشو ابيض " كومبوزيت" ولا بلاتين ؟ لازم يا علي تراجع كل معلوماتك قبل ما تروح العياده كفايه الي سامح هيقولهولك ده انت هتسمع كلام خد وضعية الدكتور كده و خليك واااثق في نفسك ؛)
-انا سمعت في المحاضره ان حشو البلاتين ده بيكون قوي اوووي و ممكن يفضل ٢٠ سنه لو اتعمل صح و عنده قدره تحمل عاليه جدا
-اول مابيتعمل بيكون لونه فضي و بيتحول للون الاسود عشان بيحتوي ع الفضه الي بتتفاعل مع الاكل الي فيه كبريت و بتسود كمان اللون بيتغير لانه بيتأكسد جوا الفم عشان كده بيتعمل في الاسنان الخلفيه بس المواد الناتجه عن الاكسده دي مبتكونش مضره لانها بتقفل اي فراغات بين السن و الحشوه و بالتالي مش هيتجمع اكل في الفراغات دي و يسبب تسوس تاني
-بس حشو البلاتين ده لو خبط في اي معدن تاني و في وجود اللعاب بيعمل الم خفيف شبه الكهربا اسمه galvanic shock بسبب تكون تيار كهربائي بسيط و ده بردو ممكن يحصل لو الملعقه خبطت في الحشوه و انا باكل.
-حشو البلاتين بيستلزم شكل معين لتجويف الحشوه جوا السن لانه بيستمد ثباته من الشكل ده يعني مينفعش الي يتشال من السن يكون على قد التسوس و خلاص لا لازم يتشال جزء كبير عشان يدي عرض و سماكه للحشوه عشان ماتتكسرش
-هو اسمه بلاتين بس هو اصلا عباره عن سبيكه فيها فضه و نحاس و زنك و كمان فيها ماذه الزئبق السامه عشان كده المدارس الحديثه في طب الاسنان بتتجنب استعماله لان ع المدى الطويل التعرض للزئبق ده بيسبب امراض كتير
-طبيعي يكون في الم مع الحاجات البارده بعد الحشوات دي و ده بيقل مع الوقت
-لو كان التسوس عميق لازم يتحط ماده مبطنه تحمي العصب لان السبيكه دي مكونه من معادن و بالتالي هتكون موصله للحراراه و الحراره دي ممكن تضر العصب...
استنونا في الجزء الجاي عشان نعرف علي قرر يعمل ايه